Blogger Tips and TricksLatest Tips And TricksBlogger Tricks

Sunday, November 15

Marsiya Mir Anees Text Collection

Hadith
http://www.jaunpurazadari.com/
http://www.jaunpurazadari.com

"Jab qataa ki masaafat-e-shab aaftaab ne"
1) Chillaya haath maar ke zaanoo pe Ibne Saad
Ai wa fazeehata, ye hazeemat zafar ke baad
Zeba dilawaron ko nahi hai khilaaf-e-waad
Aik pehelwaa ye sunte hi garja misaal-e-raad
Naara kiya ke karta hoon hamla Imaam par
Ai Ibne Saad likh de zafar mere naam par
2) Bala qad o qulfat, tan o mand o kheera sar
Roai'n tan o siyaah, dar o aahni kamar
Nawaq payaam-e-marg, ke tarkash ajal ka ghar
Taighein hazaar toot gayin jis pe wo sipar
Dil mein badi, tabeeyat-e-bad mein bigaad tha
Ghode pe tha shaqi ke hawa mein pahaad tha
3) Saath uske aik usi qad o qamat ka aik yal
Aankhen kabood, rang siyaah, abroowo pe bal
Badkaar o badshiyaar o sitamgaar o pur waghal
Jung aazma, bhagaaye hue lashkaron ked dal
Bhaale liye, kasay hue kamrein sataiz par
Naza ye zarb-e-gurz pe, ye taigh-e-taiz par
4) Khhich jaaye shaql-e-harb wo tatbeer chahiye
Dushman bhi sab makar ho, wo taqreer chahiye
Tezi zubaa mein soorat-e-shamsheer chahiye
Faulaad ka qalam, dam-e-tehreer chahiye
Naqsha khichega saaf saf-e-kaarzaar ka
Paani dawaat chahati hai Zulfiqaar ka
5) Lashkar mein iztaraab tha, faujo mein khalbali
Sawant behawaas, hirasaa'n dhani bali
Dar tha ke lo Hussain badhe, taigh ab chali
Ghul tha idher hain Marhab o Antar, udher Ali
Khaiber) and Imam Hussain(as) was Hazrat Ali(as)
Kaun aaj sar baland ho aur kaun past ho
Kiski zafar ho dekhiye, kiski shikast ho
6) Aawaz di ye Haatif-e-Ghaibi ne tab ke haa'n
Bismillah ai Ameer-e-Arab ke suroor-e-jaa'n
Utthi Ali ki taigh-e-do dum chaat ke zabaa
Baithe durust ho ke faras pe Shah-e-Zamaa
Waa'n se wo shor bakht badha naara maar ke
Paani bhar aaya moo mein idher Zulfiqaar ke
7)Lashkar ke sab jawaa thay ladaai mein jee ladaaye
Wo bad nazar tha aankhon mein aankhen idher gadaaye
Taighein ladi sipaah ki ya abr gadgadaaye
Ghusse mein aa ke ghode neb hi daant katkataaye
Maari jo taap dark e hate har laee ke paav
Maahi pe dagmaga gaye gaav-e-zamee ke paav
8) Zaalim utha ke gurz ko aaya janaab par
Taari hua ghazab Khalaf-e-Boo Turaab par
Maara jo haath, paav jamaa kar rakaab par
Bijli giri shaqi ke sar-e-pur itaab par
Bad haath mein shikast, zafar naik haath mein
Haath ud ke jaa gira kai haath, aik haath mein
9)Kuch dast-e-paacha ho ke chala tha wo naabkaar
Panje se par ajal ke kahaa jaa sake shikaar
Waa usne baaye haath mein li taigh-e-aabdaar
Yaa'n san se aayi pusht ke faqro pe Zulfiqaar
Qurbaan taigh-e-taiz-e-Shah-e-naamdaar ke
Do tukde thay sawaar ke, do raahwaar ke
10) Phir doosre pe gurz uttha kar pukaare Shaah
Kyon? Zarb-e-Zulfiqaar pet u neb hi ki nigaah?
Sarshaar tha sharaab-e-takabbur se roosiyaah
Jaata kahaa ke maut to roke hue thi raah
Ghul tha usay ajal ne badhaaya jo gher ke
Lo, doosra shikaar gaya moo mein sher ke
11) Aaya shaqi ke asp-e-Shah-e-Dee palat pada
Sabit hua ke sher-e-garisna jhapat pada
Taigh-e-shaqi ne dhal pe maara to pat pada
Zarbat padi ke gumbat-e-dauwaar phat pada
Paiwand sadr-e-zeen, jasad(body) o farq(head) ho gaya
Ghoda zamee mein seene talak gharq ho gaya

http://www.jaunpurazadari.com/

AIN-E-HUSSAIN (EYES OF HUSSAIN)
Aankho ko kahiye ain to ain-e-khata hai ye
Parde na kyon ho saat ke noor-e-Khuda hai ye
Sab ko hai chashmdasht ke ain-e-ata hai ye
Beemaar khud pa sab ke maraz ki dawa hai ye
Sarkhush bhi jaam in ki jo ulfat mein pee gaya
Dekha nigaah-e-lutf se jisko wo jee gaya
Ahsaan bhi haya bhi murawwat bhi qeher bhi
Khud maut bhi hayaat bhi amrit bhi zeher bhi
Beena bhi nuqtasanj bhi danaa-e-deher bhi
Tasneem bhi Behisht bhi Kausar ki neher bhi
Sar sharm se jhukaaye hai nargis riyaaz mein
Jannat sawaad mein, Yad-e-Baiza bayaaz mein
Aahu Shikaar o teer o kamaadaar o sher geer
Hushyaar o khush nigaah o sukhansanj o dilpazeer
Khoo’nrez o jaa’nfareb o dilavez o benazir
Qabze mein abruo’n ki kamaanein, mizhah ke teer
Jis saada dil ko inki siyaahi ki yaad ko
Nakhwaanda bhi gar ho to raushan sawaad ho
Aahufareb o ashwafarosh o karishmasaaz
Tannaaz o sharmgeen o giraa’n khwaab o sarfaraaz
Haqbeen o paakbaaz o Khudabeen o Beniyaaz
Bedaar o daaghdeeda o khoo’nbaar o ghumtaraaz
Gird iske phir, ye Kaaba-e-eemaa’n ka tauf hai
Bas ai Anees bas nazar-e-bad ka khauf hai



http://www.jaunpurazadari.com/
Nikli jo ran mein taigh-e-Hussaini ghilaaf se".
1) Masroof jung-e-taigh mein the ibne Qillageer
Nikla pare se ik qadar andaaz-e-benazir
Bad kesh o kaj nihaar o khata pesha o sharer
Palle se tod deta tha joshan ko jista teer
Kya koi iske aage bhala sar uttha sake
Rustam bhi jis kamaa ka na seesar uttha sake
2) Qabze mein taigh leke pukaare Shah-e-Zamaa'n
Haa'n, naavaq afghani mujhe dikhla to ai jawaa'n
Haa'n, nikli mooh se yaa'n, ke khhichi us tafar kamaa'n
Khhichna kamaa'n ka tha ke chala teer-e-be amaa'n
Halqa udhar kamaan ka kham ho ke reh gaya
Yaa'n taigh-e-Sheh se teer qalam ho ke reh gaya
3) Khali isi ravash se hua tarkash-e-shareer
Toode lagaaye kaat ke Hazrat ne saare teer
Chaha tha kashmakash mein ke ho jaaye gosha geer
Chillaye Sheh, ke bhaag na o sarkasho'n ke peer
Peechhe hatei'n pa paao, mazaa hai ye jung ka
Tu bhi to tod dekh le mere khudang ka
4) Yaa'n dosh se kamaa ko utara janaab ne
Qabze mein maah-e-nau ko kiya aaftaab ne
Bete ke haath choom liye Boo Turab ne
Taaka khata ko teer-e-nigaah se sawaab ne
Tarkash bhi azhdaha sa dehen knolne laga
Nikla uqaab-e-teer to par tolne laga
5) Chille mein rakh ke teer badhe Qibla-e-Umam
Ik haath raast kar ke kiya doosre ko kham
Kuch keh ke gosh-e-Sheh mein chala teer-e-tez dum
Awaaz di kamaa ne zahe shaah-e-baa karam
Chilla to shusht-e-Shaah-e-Zaman se nikal gaya
Waa'n teer dil ko tod ke san se nikal gaya
6) Gurz o sinaan o taigh o tabar kaampne lage
Naize misaal-e-shaakh-e-shjar kaampne lage
Dar se kamma kashon ke jigar kaampne lage
Go tarkashon mein teer the, par kaampne lage
Peechhe hate, khade the jo zaalim badhe hue
Goshon se khud utar gaye chille chadhe hue

http://www.jaunpurazadari.com/
Jab ran mein sarbaland Ali ka alam hua"
A marsiya of Hazrat Abbas
Nikla wo sher khaime ke baahar alam liye
Mujre ko aayi fathe sipaah-e-hasham liye
Jurrat ne badhke bosa-e-taigh-e-do dum liye
Nusrat ne choome paav, zafar ne qadam liye
Khursheed ka jalaal nigaahon se gir gayaa
Iqbaal sar ke gird humaa ban ke phir gaya
Aaya sajaa hua wo samand-e-Buraaq Sair
Tha jo falak pe udne ko taiyaar misl-e-tair
Hota tha uske dar se ghazaalon ka haal ghair
In mein sipaah-e-shar use rokein, to ye bakhair
Sar sar qadam ki gard ko paati nahi kabhi
Dhoonde basher, pari nazar aati nahi kabhi
Wo zaib o zain zeen ki wo saaz wo phaban
Zevar mein jaise hoti hai aaraasta dulhan
Chashm-e-siyaah deeda-e-aahu pe taanazan
Sar’at ye thi ke bhoolte the chaukdi hiran
Jaadu tha maujiza tha pari thi tilism tha
Paakhur na thi zirah mein tehemtan ka jism tha
Rakkha qadam rakaab mein Haider ke laal ne
Nalain-e-paa ko fakhr se chooma hilaal ne
Bakhshi jo sadr-e-zee’n ko zia, Khush Khisaal ne
Dum ko chawar kiya faras-e-bemisaal ne
Kis naaz se wo rashk-e-ghazaal-e-khutan chala
Taoos tha ke sair ko soo-e-chaman chala
Khushboo se arz-e-paak riyaaz-e-jinaa’n bani
Gard ud ke ghaaza-e-rukh-e-laila wishaa’n bani
Jalwe se raah-e-dasht-e-bala kehkashaa’n bani
Zarre bane nujoom, zamee aasmaa’n bani
Sum burd thay to naal bhi chaaro hilaal thay
Naqsh-e-sum-e-faras se hazaaro hilaal tahy
Wo dabdaba wo satwat-e-shahana wo shabaab
Tharraa raha tha jiski jalalat se aaftaaf
Wo raub-e-Haq ke sher ka zohra ho aab aab
Saulat mein fard, Daftar-e-Jurrat mein intekhaab
Tevar mein saare taur Khuda ke Vali ke hain
Shaukat pukaarti hai ke bete Ali ke hain
Pohche jo dasht-e-kee’n mein udate hue faras
Ghode ko haath uttha ke ye aawaaz di ke bas
Dekhein safein jami jo chap o raas o pesh o pas
Naara kiya ke neher pe jaane ki hai hawas
Rokega jo wo maut ke panje mei aayega
Hat jaao sab ke sher taraai mein jaayega
Roke humein nikal ke jo taaqat kisi mein ho
Le taigh miyaan se jo shajaa’at kisi mein ho
Garmaaye rakhsh ko jo haraarat kisi mein ho
Aaye jo harb o zarb ki qudrat kisi mein ho
Do haath mein Ali ke pisar waar paar hain
Darya nahi jo ruk gaya, hum Zulfiqaar hain
Tum kya pahaad beech mein gar ho to taal dein
Shero’n ko hum taraai se baahar nikaal dein
Mohlat na aik ko dam-e-jung o jadaal dein
Paani to kya hai, Aag mein ghode ko daal dein
Moo dekhte hain jo hain negehbaan ghaat ke
Le jaayein ghar pe taigh se darya ko kaat ke
Sarkash hain sab hamaari zabardastiyon se zer
Dada shuja hai, baap Ululazm, hum deler
Jab ran pada hai kar diye hain zakhmiyon ke dher
Laaye thay jaake aag se paani Khuda ke sher
Afreet bhaagte hain wo chotein hamaari hain
Beerul Alam mein kood ke talwaarein maari hain
Jurrat jilo mein rehti hai nusrat rakaab mein
Lete hain ghaat pair ke taighon ki aab mein
Likkhay hue hain shero ke hamle kitaab mein
Faslein hain apne zor ki khaiber ke baab mein
Naasir hain Baadshah-e-Falak-Baargaah ke
Daftar ulat diye hain Arab ki sipaah ke
Be mashq ke bhare humein aata hai chain kab
Garmi mein pyaas se kai bachche hain jaa’nbalab
Asghar ki godiyon mein tadapte kati hai shab
Kya waqt hai Hussain ke bachchon pe hai ghazab
Laale pade hue hain Sakeena ki jaan ke
Kaante mujhay dikhaaye thay sookhi zabaan ke
Ibrat ki ye jagaa hai ke hum aur sawaal-e-aab
Saqqaa bane hain dekh ke bachcho ka iztaraab
Is mashq ne kiya humein uqba mein kaamyaab
Allah ri aabroo ke behishti mila khitaab
Sheh se nishaan-e-fauj-e-payambar bhi mil gaya
Toobaa ke saath chashma-e-Kausar bhi mil gaya
Ye zikr tha ke fauj ki jaanib se teer aaye
Naize uttha ke sher ke moo par shareer aaye
Ye bhi jhapat ke misl-e-Shah-e-Qillageer aaye
Geti hili ghazab mein Janaab-e-Ameer aaye
Ghoda uda paron ko sawaaron ke tod ke
Lapti safon pe saif bhi kathi ko chhor ke
Toda ye morcha, ye saf ulti, udhar phire
Talwaar khoo’n mein, aap paseene mein tar phire
Youn khaak pe gira ke laeeno ke sar phire
Jaise shikaar khele hue sher-e-nar phire
Thi qeher ki nigaah, ghazab ka Jamaal tha
Aankhen bhi surkh surkh thein, chehra bhi laal tha
Beshak tha inka haath Ameer-e-Arab ka haath
Pohcha wighaah mein sau taraf aik tashnalab ka haath
Aayi ajal uttha jo kisi beadab ka haath
Sher-e-Khuda ke sher ne maara ghazab ka haath
Aise jari se kisko majaal-e-masaaf thi
Youn phir ke saf ki saf ko jo dekha to saaf thi
Chalta tha misl-e-barq yameen o yasaar haath
Dar dar ke jodte thay zalaalat shiyaar haath
Inki na aik zarb na unke hazaar haath
Kaafi thay sab ko taigh-e-do dasti ke chaar haath
Aawaaz shashjahat mein bageedo bazan ki thi
Allah ka karam tha madad Panjetan ki thi
Badh badh ke kaat ti thi wo talwaar haath paav
Dar se badha na sakte thay khoo’nkhaar haath paav
Sar bach gaya to ho gaye bekaar haath paav
Chamki wo youn ke aanth hue chaar haath paav
Roohein pukaarein sher phir aaya nikal chalo
Boli ajal, ab uth ke to panjo’n ke bal chalo
Pehne hue thay jism pe zirhein jo chust chust
Chotein kadi padein to hue sab wo sakht sust
Khauf-e-ajal se bhool gaye waada-e-nakhust
Tooti safon mein haath kisi ken a thay durust
Ik short ha ke jaan gayi is ladaai mein
Ghode bhagaao, aag lagi hai taraai mein
Maghfar na sar ke paas na khanjar kamar ke paas
Bete ke paas baap na beta pidar ke paas
Qabze ke paas taigh na dasta tabar ke paas
Kadiyaa’n zirha ke paas na daaman sipar ke paas
Abvi sinaan par thi na parcham nishaan par
Paikaa’n na teer par thay na chille kamaan par
Allah re jung-e-sher-e-nayastaan-e-Karbala
Chooti bhi morcho mein na thi aadmi to kya
Pohchay taraai mein to ye aada ko di sada
Kyon? Ab ye neher kiski hai, ai qaum-e-ashqaya?
Aik aan mein shikast hazaaron ko dete hain
Dekho asad taraai ko youn chheen lete hain
Raste khule hue hain kahaan hai wo bandobast?
Kisne ye room o shaam ki faujon ko di shikast?
Kya ho gaye taraai se wo sab hawa parast?
Kyon sar baland kaun hai is waqt, kaun past?
Faujon mein youn kisi ne bhi ghode udaayein hain?
Dekho to hum kahaa se kahaa ladte aaye hain
Dunya bhi ik taraf ho to hum pe zafar na paaye
Faaqon mein sher bhi ho muqabil to moo ki khaaye
Kis dabdabe se jauhar-e-jung-e-Ali dikhaaye
Ab kuch alam nahi, ajal aaye ke jaan jaaye
Bas hum ne ghaat chheen liya, mashk bhar chuke
Shero ne jo zabaa se kaha tha wo kar chuke
Lab tashna teen din se hain aur hai furaat paas
Chaahein abhi to haath badha kar bhjhaayein pyaas
Par zeher hai baghair Shah-e-Aasmaa’s Asaas
Marte hain aabru pe Gulamaan-e-Haq Shanaas
Aaqa ki tashnagi pe jigar chaak chaak hai
Be inke aab-e-Khizr bhi howe to khaak hai
Farma ke ye samand ko daala furaat mein
Goya-e-Khizr utar gaye aab-e-hayaat mein
Daryadil aisa kaun hua Kaynaat mein
Tasma pakad ke mashk bhari aik baat mein
Seraab jab talak ke Shah-e-Behr o Bar na ho’n
Manzoor hai ke haath bhi paani se tar na ho
Darya se mashk bhar ke jo nikla wo naik naam
Umdi siyaah ghata ki tarha sab sipaah-e-Shaam
Youn doob ke nikalta tha wo Aasmaa’n Maqaam
Zaahir ho jaise abr mein chhup kar Mah-e-Tamaam
Maujein thi rood-e-Neel ki, faujo’n ka dal na tha
Par waah ri hawaas ke abru pe bal na tha
Ghere the aik jaan ko do laakh ahl-e-shar
Thehere kahaa’n, qaraar kahaa’n le, thame kidhar
Chhati ke paas barchhiyaa’n, taighein qareeb-e-sar
Pehlu mein is taraf to sinaanein, udhar tabar
Milti na thi amaa sipah-e-teer’a bakht se
Gosho’n se teer chalte the patthar darakht se
Jab mashk ki taraf koi aata tha san se teer
Kehte the Ya Hafeez kabhi gaah Ya Qadeer
Chilla raha tha Shimr-e-jafa pesha o sharer
Jaane na paaye Lakhte Dil-e-Shaah-e-Qillageers
Rukh is jari ka khaime ki jaanib se mod do
Haa’n barchhiyo’n se sher ke seene ko tod do
Sun kar zabaa’n daraazi-e-Shimr-e-sitam shiaar
Abbas misl-e-sher jhapat’te the baar baar
Talwaarein saikado’s thein, hazaaro’n the naizadaar
Todi agar ye saf to jami doosri qataar
Tanha sambhaale mashk o alam ya wigha kare
Balwa ho puri fauj ka jis par wo kya kare
Mash’hur hai ke aik pe bhaari hain do basher
Dar pe the ik jawaa’n ke liye laakh ahl-e-shar
Khaaye idher se zakhm jo ki us taraf nazar
Kis kis ka waar rad karein dekhein kidhar kidhar
Jab dum liya to seene pe sau teer chal gaye
Pehlu ko tod tod ke naize nikal gaye
Seena sipar the mashk pe roke hue the dhal
Ladne mein bhi Hussain ke bachcho’n ka tha khayaal
Kehta tha dagmaga ke faras par wok Khush Khisaal
Farzand ko sambhaaliye, Ya Sher-e-Zuljalaal
Jaa pohchu’n mashk le ke jo thodi si raah ho
Aisa na ho ke pyaaso’n ki basti tabaah ho
Ye kehte the ke toot pada lashkar-e-shareer
Bas chur ho gaya pisar-e-Shaah-e-Qillageer
Aakar laga miyaan-e-do abroo pe aik teer
Teora gaya Ali-e-Wali ka Mah-e-Muneer
Chhori jo bag paav faras ke bhi ruk gaye
Phaila ke haath mashk-e-Sakina pe jhuk gaye
Sheh daud kar pukaare ke aata hu Bhai Jaan
Ghar lut gaya hai khaak udata hu Bhai Jaan
Taaqat badan mein ab nahi paata hu Bhai Jaan
Ik ik qadam pe thokarein khata hu Bhai Jaan
Dast-e-shikasta bete ki gardan mein dale hain
Bhaiyya humein to Akbar-e-Mehru sambhaale hain
Akbar ne Sheh ke haath pakad kar basad buka
Rakkhe chacha ke seene pe aur ro ke ye kaha
Leeje yahi hai laash-e-Alamdaar-e-Bawafa
Chillaye jhuk ke laash pe Sultan-e-Karbala
Tooti hui kamar hai sambhaalo Hussain ko
Bhaiyya zara gale se laga lo Hussain ko
Abbas haath kat gaye shaano’n se hai ghazab
Reti pe do taraf hai tumhara lahu ye sab
Loota humein Rasool ki ummat ne besabab
Bhaiyya humari jaan nikalti hai tan se ab
Mar jaayenge, jila do humein mu se bol ke
Do baatein kar lo bhai se aankhon ko khol ke
Ghash mein suni jo girya-e-Shabbir ki sada
Chauke tadap ke Hazrat-e-Abbas-e- Bawafa
Aahista ki ye arz ke ai Sibte Mustafa
Is pyaar ke nisaar, is ulfaat ke fida
Zeba hai nikle jaan agar peshwaai ko
Goya Rasool aaye hain Mushkil Kushaai ko
Ye keh ke roye, Sheh ki taraf ki nazar baghaur
Jhuk kar pukaare Shaah ke “Bhaiyya kaho kuch aur”
Tadpa qadam pe Sheh ke wo maqtool-e-zulm o jaur
Lein hichkiyaa’n, bigadne lage tewaro’n ke taur
Pathra ke chashm-e-ask fishaa’n band ho gayi
Tharraaye dono ho’nt, zabaa’n band ho gayi
Akbar ne arz ki ke chacha jaan mar gaye
Jhuk kar pukaare Shaah ke “bhaiyya kidhar gaye”
Mu to uthaao khaak se rukhsaar bhar gaye
Wa hasrataa, Hussain ko beaas kar gaye
Ab kaun dega dukh mein Nabi ke pisar ka saath
Dum bhar mein tum ne chhor diya umr bhar ka saath
Haa’n ro lo momino ke buka ka maqaam hai
Tum mein shareek Rooh-e-Rasool-e-Anaam hai
Ab rukhsat-e-Hussain Alaihis Salaam hai
Tareekh athwi hai, Moharram tamaam hai
Maut aayi to shareek-e-aza kaun howega
Jo saal bhar jeeyega wo phir Sheh ko rowega
Aage tumhaare marte jo Abbas-e-Bawafa
Pursa na dete Sibte Rasool-e-Khuda ko kya
Tum sab ko dekhte hain Shehenshaah-e-Karbala
Zehra bhi nange sar hain, qayamat karo bapa
Samjho shareek-e-bazm Shah-e-Mashraqain ko
De lo jawaan bhai ka pursa Hussain ko
Peeto saro’n ko hota hai ab marsiya tamaam
Lipto Zari-e-paak se keh keh ke “Ya Imaam”
Rukhsat talab hai baap se Akbar sa Laalafaam
Khamosh hain Hussain, nahi karte kuch kalaam
Maqtool zulm o jaur hai ab ran mein Fatima
Hota ha Panjetan ka koi dum mein khatima
Bas ai Anees rok le ab khaama ki inaa’n
Ye ghum hai jaa’n guzaa, na kabhi hoega bayaa’n
Aankhon se saamaeen ke bhi askh hain rawaa’n
Khaliq se arz kar ke ai Khallaq-e-Ins o Jaa’n
Aankhon se mas karu mai Mazaar-e-Batool ko
Dikhla de jald Marqad-e-Sibte Rasool ko
http://www.jaunpurazadari.com/
A marsiya of Hazrat Ali Akbar
Manind-e-sher jung mein thi chaar su nigaah
Chhup chhup ke badliyo’n se nikalte thay misl-e-maah
Lekin ajal se bas nahi chalta kisi ka aah
Dekha jo phir ke youn nazar aayi adam ki raah
Chhaait pe lag ke pusht se naiza guzar gayaa
Ubla lahu to umr ka paimana bhar gaya
Naiza laga ke zor se khaincha laee’n ne jab
Tukde kai jigar ke nikal aaye hai ghazab
Harne pe sar jhuka ke jo sambhlaa wo tashnalab
Tar ho gayi lahu se qabaa Mustafa ki sab
Ghash aaya, nabzein chhut gayi’n, tevar badal gaye
Halqe rakaab ke bhi qadam se nikal gaye
Faryaad hai ke toot pada lashkar-e-giraa’n
Harbe tamaam fauj ke aur aik naujawaa’n
Girte hue faras se pukaraa wo neem jaa’n
Leeje khabar ghulam ki ai Qibla-e-Zamaa’n
Jaldi uthiye mujhay dasht-e-nabard se
Ab jaan nikli jaati hai chhati ke dard se
Sun’na tha ye ke Sheh pe gira aasmaan-e-ghum
Itna kaha ke “aah, hue ab tamaam hum”
Daude, gire, utthe, kai ja Qibla-e-Umam
Rakhkha kisi jaga to kisi ja pada qadam
Khaliq pisar ka daagh dikhaaye na baap ko
Aankho’n se kuchh dikhaai na deta tha aap ko
Chillaate the kidher ko hai tu ai jawaa’n pisar
Aashiq pisar, shafeeq pisar, meherbaa’n pisar
Mere saeed lal, mere qadrdaa’n pisar
Hoto’n pe dum hai baap ka, ai neem jaa’n pisar
Beta nibaah baap ka ab tere haath hai
Jaldi na keejiyo ke ye bekas bhi saath hai
Kis jaa sitam ki seene pe kha kar sinaa’n gire
Aawaaz phir do, ai Ali Akbar kahaa’n gire
Kis tarh ladkhadaa ke na ye naatawaa’n gire
Peeri mein jis pe koh-e-ghum-e-naujawaa’n gire
Aada se is sitam ka Khuda inteqaam le
Itna nahi koi mere haatho’n ko thaam le
Jangal mein pohche laash pe us waqt Shaah-e-Dee’n
Jab aidiyaa’n ragad rahe the Akbar-e-Hasee’n
Chillaaye paas gir ke Shah-e-Bekas o Hazee’n
Haazir hai baap ai mere farzand-e-mehjabee’n
Baba ko mutmain to karo mu se bol ke
Baahein gale mein daal do aankhon ko khol ke
Tum neb bhi mu ko baap se moda, hazaar haif
Bekas ko is zaeef ko chhoda, hazaar haif
Pehna na bar mein byaah ka joda, hazaar haif
Qismat ne taaze phool ko toda, hazaar haif
Bheegi hui maso’n pe ajab aab o taab thi
Hai hai abhi to aamad-e-fasl-e-shabaab thi
Kyon tharthara ke karwatein lete ho baar baar
Kya hai ke khaak par kisi pehlu nahi qaraar
Hazrat se dum nikalne mein bola wo Gul Azaar
Barchhi ka zakhm hai meri chhati ke waar paar
Kya haal-e-dil kahu’n, nahi taqat bayaan ki
Lo Alwida’a, jism se rukhsat hai jaan ki
Nagaah rang zard hua, haath thartharaaye
Karwat kabhi karaah ke li, gaah muskuraaye
Atka jo dum, sawaal mein paani ke lab hilaaye
Haste hue guzar gaye duniya se haai haai
Phaila ke haath paav wo maqtool reh gaya
Khushbu sue behisht gayi phool reh gaya
Bas ai Anees bas na sune the kabhi ye bain
Barpa hai bazm-e-matam-e-Akbar mein shor o shain
Mai aik kya, nahi kisi momin ke dil ko chain
Keeje madad, in apne ghulaamo’n ki YA HUSSAIN
Asrat ho dur, aish ka samaan kam na ho
Juz maatam-e-Huzoor koi aur ghum na ho

Salam By Mir Anees
Shabeeh-e-Imaam-e-Zamaa'n
Shabeeh-e-Imam-e-Zamaa khenchte hain
Tassavur meintasveer-e-jaa’n khenchte hain
Zameedar seraab hain Karbala ke
Azeeyat Imam-e-Zamaa’n khenchte hain
Jagaa mol li hai mazaaro’n ki khatir
Zamee’n pe Shah-e-Dee’n nishaa’n khenchte hain
Idher khushq hai Fatima ki zara’at
Wo kheto'n me aab-e-rawaa’n khenchte hain
Hawa lagne deti na thi jis ko bulbul
Wahi gul jafa-e-khizaa’n khenchte hain
Kahaan bediyaan aur kahaan paay-e-Abid
Ye langar kahin natawaa’n khenchte hain
Ajab haal hai Dukhtar-e-Fatima ka
Rida sar se eezarawaa’n khenchte hain
Pukaarien Sakina duhaai hai baba
Sitamgar meri baaliyaa’n khenchte hain
Kati jaatein hain gardanein Bibiyon ki
Rasan ko jo eezarawaa’n khenchte hain
Ye aalam hai furqat mein kehti thein Zehra
Ke rag rag se jis tarha jaa’n khenchte hain
Kaha Sheh ne “Hushyaar ai qaum-e-nari”
Hum ab taigh-e-aatish fishaa’n khenchte hain
Qalam youn hai kagaz pet ham tham ke chalta
Qadam jis tarha natawaa’n khenchte hain
Bohot baagh duniya ke kaanto se uljhay
Bas ab rakhs soo-e-jinaa’n khenchte hain
Qadam bediyon mein, hain rassi mein bazoo
Ye dukh Aabid-e-natawaa’n khenchte hain
Kaha ro ke Akbar ne “Ai dard tham jaa”
Kaleje se baba sinaa’n khenchte hain
Bohot hum ko peesa hai, ik din tujhay bhi
Shikanje mein ai aasmaa’n khenchte hain
Mohabbat ka rishta nihayat hai nazuk
Mujhay kis liye qadrdaa’n khenchte hain
Qaree sar ke hai aaftaab-e-Qayamat
Lehed par abas saaibaa’n khenchte hain
Dikha doo Zameen-e-Najaf ki bulandi
Bohot aap ko aasmaa’n khenchte hain
Nas-e-ghum ki shiddat se kehte thay Abid
Ajab sakhtiyaa istakhwaa’n khenchte hain
Zamee ke tale jin ko jaana hai ik din
Wok yon sar ko ta aasmaa’n khenchte hain
Faqeeron ne yaa paav phaila diye hain
Ajab haath ahl-e-jafaa’n khenchte hain
Abas hai adu dar pe ai qatl-e-Asghar
Ye eezaa kahin bezabaa’n khenchte hain
Wo hain pehelwaa, hum jo qoowat dikhayein
Falak pe sipar kehkashaa’n khenchte hain
Sukhan hai agar baa’is-e-tulkh kaami
To hum aap apni zabaa’n khenchte hain
ANEES is zamee'n mein bohot kam hai wus’at
Kumait-e-qalam ki inaa’n khenchte ha in
Jis Dum Yazid Shaam Mein Masnad-Nashin Hua

JIS DUM YAZID SHAAM MEIN MASNAD-NASHIN HUWA,
SUB MULK ROOSIYAH KE ZEERE RANGEEN HUWA,
SHABBIR SE ZIYAD USAY BUGHZ-O-KEEN HUWA,
E’IZAAYE AHLEBAIT KE DAR PE LA’EEN HUWA;
KEHTA THA SALTANAT KA TOH SAMAAN DURUST HAI,
SAKHTI NA UNPE HO TOH RIYASAT YEH SUST HAI.
KHAT HAAKIM-E-MADINA KO LIKHA BA SHADD-O-MAD,
MAZMOON YEH THA KE TUB HAI ITA’AT TERI SANAD,
BAY’AT MERI HUSAIN SE LE TOH BA JADD-O-KAD,
MAIN FAUJ BHEJTA HOON KAREGI TERI MADAD;
BAI’YAT KAREIN TOH JALD IDHAR BHEJ DEEJIYO,
RAAZI NA HON TOH KAAT KE SAR BHEJ DEEJIYO.
POHCHA USAY MADINE MEIN JAB NAMA-E-YAZID,
PARDHKAR WO KHAT BOHOT MUTARADDID HUWA WALID,
DIL MEIN KAHA YEH ZALIM TOH HAI AQL SE BA’EED,
MAIN FATIMA KE LAAL KO KYONKAR KAROON SHAHEED;
DA’AWA-E-SALTANAT BHI NAHIN BE QUSOOR HAI,
AISE KINARAH KASH PA SITAM KYA ZAROOR HAI.
AAKHIR KISI KO BHEJ KE SHAH KO KIYA TALAB,
BHAI BHATIJE SHAH KI KHAATIR THAY SAB KE SAB,
FARMAYA USS SAY JAKAR MAIN AOONGA WAQT-E-SHAB,
MA’ALOOM HAI MUJHE JO BULAANE KA HAI SABAB;
SUB JAANTE HAIN BAIY’AT-E-FASIQ HARAM HAI,
USKI TALAB HUMEIN YEH AJAL KA PAYAAM HAI.
GHABRA GAYE YEH SUNKE AZEEZ-O-RAFIQ-O-YAAR,
QASIM NE RAKHLI SAAMNE SHAMSHIR-E-AABDAR,
AKBAR NE BHI TALAB KIYA ASBAB-E-KAARZAR,
AAYE KAMAAL-E-GHAIZ MAIN ABBAS NAMDAR;
KEHKAR YEH BAAT SAROT-E-SHER UTTH KHADE HUWAY,
HAAKIM KE GHAR NA JAAYENGE HUM BE LADE HUWAY.
ZAINAB KE DONO BETON KO USS DUM RAHI NA TAAB,
JAKAR HARAM SARA MEIN KAHA BAASADDE IZTERAAB,
HAAKIM KE GHAR MEIN JAATE HAI SHAH-E-FALAK JANAAB,
AMMA HUMARE NEEMCHAY LADEEJIYE SHATAAB;
BIGDEGI GAR TOH KHOON KE DARYA BAHAAYENGE,
KAAM AAJ BHI NA AAYE TO KIS KAAM AAYENGE.
SOON KAR SUKHAN HOGAYA ZAINAB KA RANG ZARD,
AANSU BHAR AAYE AANKHON MEIN UTTHA JIGAR MEIN DARD,
BOLI KALEJA THAAM KE AUR BHAR KE AAH SARD,
KYA WAALI-E-MADINA HAI AAMAADAH NABBASARD?
AISEE ALI KE LAAL SE TAQSEER KYA HUWI,
KYA JURM KYA GUNAAH HUWA KYA KHATA HUWI?
HAI MULK SE GHARZ NA USAY HUBB-E-JAAH HAI,
QABZE MEIN NA KHAZAANA HAI AUR NA SIPAH HAI,
LOGON SE RAABTA HAI NA GHAIRON SE RAAH HAI,
JAA-E-NASHAST QABR-E-RISALAT PANAAH HAI;
NAAHAQ YEH ZULM, HAQ SE NAHIN LOG DARTE HAIN,
JANG USS SAY JIS GHAREEB PE FAAKHE GUZARTE HAIN.
NANA HAIN USKE SAR PE NA HAIDAR HAIN NA HASAN,
SADQE GHAREEB BHAI PE HOJAAYE YEH BAHAN,
ZINDAH HAI JAB TALAK YEH TOH JEETE HAIN PANJATAN,
MARZI HAI DUSHMANON KI TOH HUM CHHORD DEIN WATAN;
GAR YAAN MILEGA CHAYN NA ZAHRA KI JAAYI KO,
JANGAL MEIN JAA RAHEGI BAHAN LEKE BHAI KO.
BHAI KO MERE PAAS BULAO SUNOON MAIN HAAL,
KYA BAAT HAI JO QAATAR AQDAR PE HAI MALAAL,
TANHA CHALA NA JAAYE KAHIN FATIMA KA LAAL,
BHAI PE KUCHH BANAY TOH KHOLOONGI SAR KE BAAL;
SHAYAD DAGHA HO JANG KA SAAMAN LIYE CHALAIN,
HAAKIM KE GHAR MEIN SAATH MUJHE BHI LIYE CHALAIN.
ZAINAB YEH KEH RAHI THI KE AAYE IMAM-E-DEEN,
MUNH DEKH SHAH KA RONAY LAGIN ZAINAB-E-HAZEEN,
FARMAYA SHAH NE ROTI HO KYON KHAUF KUCHH NAHEEN,
HAAKIM KE GHAR MEIN JAAYEGA HAIDAR KA JANASHEEN;
WO AUR HAI JAGAH TUMHEIN JISKA KHAYAAL HAI,
HAAN MUJH PE HAATH UTHHAYE KOI KYA MAJAAL HAI.
SAMJHA CHUKE BAHAN KO JO HAZRAT BACHASHM-E-TAR,
BANDHI SHAH-E-NAJAF KE KAMAR BANDH SE KAMAR,
DAALA ABAA-E-PAAK MOHAMMAD KO DOSH PAR,
LE KAR ASSA NABI KA CHALAY SHAH-E-BAHROBAR;
YUN SAATH THAY AZEEZ SHAH-E-KUM SIPAH KE,
JAISE SITAARE CHARQ PE HON GIRD MAAH KE.
USS DUM KAMAAL HAZRAT-E-ZAINAB THEEN BEQARAR,
BAIT-USS-SHARAF SE JAATI THEEN DAYWRDI PE BAAR BAAR,
ABBAS SE BULAKE KAHA AYE WAFA SHEYAAR,
BHAI KO CHHORDYO NA AKELA BAHAN NISAAR;
HAAKIM SE HUM SUKHAN JO SHAH-E-QUSH QISAAL HON,
TUM IK TARAF HO EK TARAF MERE LAAL HON.
YEH BAAT KEHKE RONE LAGI WOH JIGAR KABAAB,
CHALEES SHAQS LE KE CHALA IBN ‘BUTURAAB,
JO DEKHTA THA SHAAN-E-IMAM-E-FALAK JANAAB,
KEHTA THA WOH KE RAAT KO NIKLA HAI AAFTAAB;
RASTE MAIN SHAB KO HUSN-E-NABI KA ZAHOOR THA,
AFLAAK TAK ZAMEEN KE SITAARON KA NOOR THA.

bibi_zehra


Mir Anis marsiya write ups, qaseda,nazm and many more

Aye Dost Ibne Saqi-e-Kosar Hussain Hai (mir anees Urdu marsiya)

MArsiya Hazrath Ali(a.s)

Garmi-e- dasht-e-karbala by Babar Ali Anees [ 1804- 1874]

Karbala By Mir Anees

http://www.jaunpurazadari.com/

2 comments:

  1. Asalam o alikum
    Mujhay zaafar jin ka marsia text format main chahiye, agar mil sakay to bht mamnoon hunga
    allah apko jazay kher ata farmaen
    amin

    syed imran junaid

    ReplyDelete
  2. I want marisay: Likha hai jab Saluke pe Asghar ka Khun baha

    ReplyDelete

Popular Azadari Video